Test Footer 2

2009/03/05

ضحيتى بمين ..للشاعر محمد جودة


ضحيتى بمين ؟ .
ضحيتى بمين ؟.
علشان تعملى تاج راسك .. مين ؟؟.
وغدرتى مين ..؟.
علشان تعملى حراسك .. مبن ؟؟.
يا أم البساتين
كانت حلوة ، ونفسها تطرح فضة ليوم الدين .
راح فين الخير؟ والنيل؟ والطير؟ وصلاح الدين؟.
ضحيتى بمين ؟
علشان تعملى تاج راسك مبن ؟
ضحيتي بعـود .. من خير جنود ..
الحب فى قلبه ما لهش حدود
كان واقف لجل عنيكي السود .. صايم
وضميرك كان فاطر
سليمان خاطر
قلب ميعرفش يكون مسجون
في بلاده طايح فيها الدون
أم قالوا عليه راجل مجنون
قتل المخاليق الشريرة
الى بيشربوا مية نيلنا ويصبوا فى مصارينا البيرة
آم زعلوا الناس السكيرة
إلى عشان كاس .. بيهينوا الناس ..
ويبيعوا الأمة بتعميرة
لابسين لحدانا قميص النوم ، وعليه الشنابات العيرة
يا صباح مجروح
عزام ها يروح للأهل ، وهنا سليمان مدبوح
قتلوه يا مة ، صابح مشنوق ، مدلل فوق ،
والأمة إلى مدلدلة من تحت
من كتر المشي فى ضل الحيطة وأكل الكحك ..
سلمت الراية لواحد ندل وزى الشحط ..
عمال بيهنها وبياخدها من فحت لفحت
سليمان مجنون ..!!
والناس إلى بايسين رجل الكون هما العاقلين ..!!
ضحيتي بمين ..؟
علشان تعملي تاج راسك مين ..؟؟
ضحيتي بأطفالك فى جنين ..!
وفى غزة ..! وقانا ..! ودير ياسين ..!
علشان تحصدي من الغدر سلام ...
وتعيشي فى أوطانك أمنة ...؟؟
ضحيتي بعسلك ... ؟؟!
ونسيتي إن ما فيش فى جراب الموت سمنة ..؟!!!
بكرة حاتتنزلي لآخر عيل فى عيالك ...
ولآخر شجرة فى شجر الفل ..!
بكرة حاتتنزلي يا ست الكل ...
فاحمدي ربنا عالموت والذل ..!
ما هو عمر حقوقنا المسلوبة
ماهترجع لينا بكام طوبة
ومقاومة ناس من حزب الله ..
ماهى برضه ماهياش محسوبة...!!!
وانتوا الحسيبة اللعيبة
والنبي تسكتوا وبلاش خيبة ..
دة انتوا بتظهروا على أي شاشات
بنقول مايخدكوش فى نصيبة ..
وهنية ياناس لما بيظهر بتعود الشمس من الغيبة
بالصدق الساطع فى عيونه ...
ربنا يحميه ... الله يصونه ..
بنحس في صوته بعزتنا وإننا عايشين ...
بنحس بصدق صلاح الدين ...
وشرف منالوش ولا أي شريف ...
وسماحة قلب ووجه نضيف ...
بيقود الأمة لمحو الزيف ...
وبتهتف بحياته الملايين ...
ضحيتي بمين .. ؟
علشان تعملي تاج راسك مين ...؟؟؟
وغدرتي بمين ...؟
علشان تعملي حراسك مين ...؟

ليست هناك تعليقات:

cc

رخصة المشاع الابداعي
egyptianfree.blogspot.com by blogger هو المرخص لها بموجب المشاع الإبداعي نسب المصنف 3.0 الاصلية الترخيص .

c

c

http://paper.li/A7med_El_Sayed